Philips Ambiglow işıqları ilə təchiz olunmuş yeni oyun monitorunu təqdim etdi

Philips şirkəti Evnia oyun seriyasına məxsus yeni monitor modelini təqdim edib. 27M2N8800 indeksli bu model QD-OLED texnologiyalı ekranla təchiz olunub — yüksək dəqiqliklə rəng ötürməsi, ani cavab müddəti və arxa paneldə yerləşən interaktiv Ambiglow işıqlandırması sayəsində istifadəçiyə virtual aləmdə daha real varlıq hissi yaşadır.

Monitor 26.5 düym ölçülü və 3840×2160 piksel qətnaməli ekrana malikdir. Ekran 240 Hz yenilənmə tezliyi, 0.3 ms cavab müddəti (GtG), 1000 nit parlaqlıq və geniş rəng spektri ilə fərqlənir (100% sRGB, 97.6% Adobe RGB, 99% DCI-P3, ΔE < 1). Qurğu həmçinin HDR standartını, «picture-in-picture» funksiyasını və iki siqnal mənbəyi ilə eyni vaxtda işləmək üçün ekranın bölünməsi rejimini dəstəkləyir.

İnterfeyslərə gəldikdə, monitor DisplayPort 2.1, HDMI 2.1, iki USB 3.2 Gen 1 portu və qulaqcıq çıxışı ilə təchiz olunub. Arxa paneldə yerləşən Ambiglow LED işıqları ekrandakı görüntüyə uyğun rəng effektləri təqdim edir. Bundan əlavə, korpusda iki 5 vattlıq dinamik yerləşdirilib. Ergonomik dayağı isə ekranın hündürlüyünü, bucağını və dönmə istiqamətini tənzimləməyə imkan verir.

Yeni Philips 27M2N8800 monitorunun Çin bazarındakı qiyməti $909 təşkil edir.

The post Philips Ambiglow işıqları ilə təchiz olunmuş yeni oyun monitorunu təqdim etdi appeared first on InfoCity.